အရိပ်မဲတို့၏ခြေရာများ(စ/ဆုံး)
——————————-
အတိတ်ဆိုတာ အတိတ်မှာထားလို့ရခဲ့ရင် သိပ်ကောင်းသွားမယ်။ မာမာ ရဲ့ဘဝက ခါးသည်းခဲ့တယ် ဆိုပေမယ့် ကိုယ်ရွေးချယ်ခဲ့တဲ့ လမ်းမို့ ကျေနပ်စွာနဲ့ ခံယူနေဆဲပါပဲ။
တခါတလေ မသိလို့ မှားမိတဲ့အမှား က တစ်ဘဝလုံးကို အစွန်းစက်တွေဖြစ်ရော။
ဪ..လူဆိုတော့လဲ စားဝတ်နေရေးတွေ မကျေလည်တဲ့ အစာအိမ်ကိစ္စတွေနဲ့။
ပြောပြနေလို့လဲ အပိုပဲ၊ ဒရမ်မာခင်းတယ်လို့တောင် ထင်ကြဦးမယ်။ တိတ်တိတ်လေး နဲ့ ငြိမ်သက်ရင်း ဘာရယ် မဟုတ်တဲ့ စီးကရက်တွေ အခိုး မထွက်အောင် သောက်ရင်း သက်ပြင်းမောတွေ အကြိမ်ကြိမ်ချမိတယ်။
လောက ကြီးက စိတ်ပျက်စရာကောင်းနေပြီနဲ့တူပါရဲ့။
******@@@*******
“နင် ဝင်ရမယ့် အလှည့်ရောက်ပြီ”
ဆိုင်မန်နေဂျာမမကြည်က အချက်ပြတယ်။ မေးဆတ်ပြီး အဖြေပေးပေမယ့် အလုပ်လုပ်ရမှာ စိတ်မပါသလို ခံစားရတယ်။
“မမမာ, ဖြူဖြူ အမေကို ပိုက်ဆံပို့ ချင်လို့ မမမာ အချိန်ဖြူဖြူ ကိုပေးပါလား”
ဖြူဖြူရဲ့ စကား ကို သေချာနားထောင်မိတယ်၊ ကိုယ်ချင်းစာတယ် ဆိုတာထက် သံယောဇဥ် ဖြစ်မိတယ်ဆိုရင်ပိုမယ်။
ဒုတိယနှစ်ကျောင်းသူလေး ဖြူဖြူ၊ မူးရူးနေတဲ့ လောကဓံရဲ့ အနိုင်ကျင့် မှုကို အလူးအလဲ ခံရင်း ဒီဘဝထဲကို သတ္တိရှိရှိရောက်လာခဲ့တယ်။
ယဥ်ကျေးတယ်၊ သိမ်မွေ့တယ်၊ နူးညံ့တယ်၊ ဖြူလွလွ အသားအရေနဲ့ ရှည်လျား တဲ့ ဆံနွယ်စ တွေက ဖြူဖြူဆိုတဲ့ အမည်နာမကို တစ်ထပ်တည်းကျ၊ သူ့ ကိုယဥ်စေတယ်လို့ ဆိုရင် ပိုမှန်လိမ့်မယ်။
တစ်ကောင်ကြွက်သမား ကိုယ့်အတွက် ငွေဆိုတာ မရှိမဖြစ် မလိုအပ်တာ မဟုတ်ပေမယ့်၊ သုံးစရာမရှိတော့ ရင်လဲ ကြိုက်တဲ့ အချိန်၊ ကြိုက်တဲ့ ဧည့်သည်နဲ့ ဝင်လိုက်ယုံပါပဲ။
တစ်နေ့တစ်ယောက်ဆိုရင်ပဲ ကိုယ့်အတွက်လုံလောက်ပြီလို့ တွေးထားသမျှ အခုလို ကာလ လူတွေ အဆင်မပြေကြချိန်၊ တစ်ပတ်တစ်ယောက်တောင် ရဖို့ ခက်ခဲလာပြီ။ ဒါကိုပဲ ကိုယ့်အလှည့်ကြတာကို သူတစ်ပါးကို ပေးဝင်ရဲတယ်ဆိုတော့၊
ဝေသန္တရာမင်းကြီးရဲ့ အလှုလောက် မကြီးမြတ်ပေမယ့်၊ အလှူတစ်ခုလို့ပဲသဘောထားတယ်။
“မမမာဧည့်သည်က သဘောကောင်းတယ်နော်၊ ညီမနဲ့ အလုပ်သာ လုပ်နေတာ မမ ကို တစ်ချိန်လုံးမေးနေတယ်
ညီမလဲ မမ မီးနီပြနေလို့ ညီမကို လွှဲပေးတာလို့ ကောင်းအောင်ပြောလိုက်တယ်”
ဆိုင်မှာ မန်နေဂျာ အပါအဝင် လူ ခြောက်ယောက်ပဲရှိတော့တယ်။ ဟိုအရင်က လူ နှစ်ဆယ်ကျော် သုံးဆယ် နီးပါး၊ အခုတော့ အားလုံးရေကြည်ရာ မြက်နုရာကို သွားကုန်ကြပြီ။
အားလုံးစားဖို့ မီးဖိုချောင်ထဲ ဟင်းချက်နေတာကို နောက်ကနေ ခါးသိုင်းဖက်ပြီး ဖြူဖြူပြောရှာတယ်။
နောက်ကစားပွဲမှာ အာလူးခွာနေတဲ့မန်နေဂျာ မမကြည်ကတော့..
“နင် သူများ ဖောက်သည်ကိုလုယူဖို့ မကြိုးစားနဲ့”
“ရပါတယ် မမကြည်ရယ် သူတို့ အဆင်ပြေရင် ကျွန်မ ကျေနပ်ပါတယ်”
မကြည်မကြားအောင် တီးတိုးလေးရွတ်မိပေမယ့်၊
စိတ်ထဲက ကျေနပ်နေမိတယ်။
*******@@@******
“မရဘူး မမကြည် ကျွန်တော်လဲ မလုပ်ချင်ဘူးဗျာ
အခုက အထက်က စာကျလာတာ ကျွန်တော်လဲ ကိုယ်ချင်းစာပါတယ်၊ မမကြည်တို့ ဘက်က ချွတ်ယွင်းတာတွေများနေပြီ၊ လိုင်းကြေးလဲ…”
စကားကို တဝက်တပျက်နဲ့ရပ်၊ ဟူးကနဲ..သက်ပြင်းမောချရင်း စိတ်မကောင်းချင်ယောင်ဆောင်နေတဲ့ ဒီနယ်ထိန်းကို သတိထားမိတာကြာပြီ။
သိပ်အဆိုးကြီးထဲက မဟုတ်ပေမယ့်..
ပိုင်ရှင်တစ်ယောက်လို မင်းမူတာကိုတော့ မကြိုက်မိပြန်ဘူး။
ဆိုင်ကိုရောက်လာတဲ့ လူသစ်မှန်သမျှ သူကို့ ပန်းဦးဆက်ရတာကို သတိရမိတယ်၊ ကိုယ်တိုင်လဲ မလွတ်ခဲ့ဘူး။
မမကြည်ရဲ့ စကားကို တသွေမတိမ်း နားထောင်ကြရပြီး၊ အကောင်းဆုံး သူစိတ်ကျေနပ်အောင် ဖြည့်ဆည်းကြရတယ်၊ စိတ်နဲ့ အခန့်မသင့်ရင် ပါးရိုက်နားရိုက် လက်မြန်တဲ့သူမို့လဲ အတတ်နိုင်ဆုံး မချစ်သော်လဲ အောင့်နမ်းကြရရှာတယ်။
ဆက်တီဆိုဖာခုံမှာ ခြေချိတ်ထိုင်ရင်း၊ ဘုရင်တစ်ပါးလို မိန့်ခွန်းတွေ ခြွေနေတယ်၊ ကိုယ်အပါအဝင် ကောင်မလေးတွေ အားလုံးက သူ့ရဲ့အောက်ကြမ်းပြင်မှာ ကျုံ့ကျုံ့လေး ထိုင်နေကြရတယ်။ မမကြည်သော်မှ သူ့ထိုင်နေကျ ဆက်တီဆိုဖာ ခုံကနေ ပြောင်းပြီး သစ်သားထိုင်ခုံပုလေးမှာ ထိုင်ရင်း ခေါင်းငိုက်ဆိုက်ချ နေရရှာပြီ။
ပုံမှန်တိုင်းဆို နွားငတ်ရေကျ သောက်တတ်သူက၊ သူ့ရှေ့ကခုံပေါ်မှာ တင်ပေးထားတဲ့ ဘရန်ဒီပုလင်းကိုအခုတော့ လက်ဖျားနဲ့တောင်မထိတော့ဘူး။
နောက်ဆုံးတော့..အားလုံးအတွက် စိတ်ပိုင်းဖြတ်လိုက်တယ်၊ တစ်ယောက်ထဲ သမားပဲ၊ ဘယ်မှာနေနေ အဆင်ပြေအောင်ကြိုးစားရမယ်။
“မမကြည် ကျွန်မသွားမယ်”
“ဟယ်..မလုပ်ပါနဲ့ဟယ်..နင်နေလို့ သိပ်ကောင်းတာမှ မဟုတ်ဘဲ”
“ရတယ်..မမကြည် နောက်တော့ပျောက်သွားမှာပါ”
”ကောင်းတယ် မမကြည် အနည်းဆုံးတစ်ယောက်တော့ အဖမ်းပြရမယ်၊ မမကြည်ကောပေါ့၊ ဒါပေမယ့် မမကြည်က အာမခံရအောင် ကျွန်တော်လုပ်ပေးမယ်၊ ဒါပေမယ့် လိုင်းကြေးတော့ ပုံမှန်ပြန်ပေးနိုင်အောင် ကြိုးစားပေးရမယ်”
“မိမာရယ် ငါ..စိတ်မကောင်းဘူးဟယ်..”
မမကြည် က ငိုသံပါနဲ့ ပြောနေပေမယ့်၊
မျက်ဝန်းက အခုမှ စိတ်အေးသွားသလို အရောင်တောက်နေတယ်။
ကျန်တဲ့ ကလေးမလေးတွေတော့ ကြိတ်ငိုသံတွေကြားနေရပြီ။
*********@@@@*******
ရန်ကုန်မြို့၊ (____) မြို့နယ်တွင် ဆယ်ကျော်သက်ရွယ်မိန်းကလေးနှင့် သူ၏အဒေါ်ဖြစ်သူကို ပြည့်တန်ဆာအလုပ်လုပ်ကိုင်နေစဥ်တွင် ဖမ်းဆည်းရမိ။
၎င်းတို့ နှစ်ဦးအား နယ်မြေရဲစခန်းက ၁၉၄၉ ခုနှစ်၊ အသစ်ပြင်ဆင်မှု ၁၉၅၆။ ပြည့်တန်ဆာနှိပ်ကွပ်ရေး အက်ဥပဒေ။ အပိုဒ်ခွဲ( ၄ )ပုဒ်မ ၃အရ၊ မိမိရှေ့တွင် ပြစ်မှုကျူးလွန်သည်ကိုတွေ့မြင်သော ရဲအုပ်အောက်အဆင့်အတန်း မနိမ့်သောရဲအရာရှိသည်၊ ပြစ်မှုကျူးလွန်သူကို ဝါရန်းမပါဘဲဘမ်းဆီးချုပ်နှောင်နိုင်၍၊ ထိုသို့ ဘမ်းဆီး ချုပ်နှောင်ခြင်းပြုပြီး၊ နောက်တနေ့ထက်နောက်မကျစေဘဲထိုပြစ်မှုကို အရေးယူပိုင်ခွင့်အာဏာရ ရာဇဝတ်တရားသူကြီးရှေ့၌ စစ်ကြောစီရင်စေရန်တင်ပို့ရမည်။ ပြစ်မှုကျူးလွန်သူကို၊ စစ်ကြောစီရင် စေရန် တင်ပို့သောအခါ၊ တရားစွဲဆိုချက်၏ အထောက်အခံဖြစ်သော သက်ဆိုင်ရာသက်သေအရပ်ရပ်ကို တင်ပြရန်အသင့်ဖြစ်စေရမည့်ပြင်၊ ပြစ်မှုကျူးလွန်သူကို ရုံးတော်သို့တင်ပို့သည့်နေ့တွင်၊ ရာဇဝတ် တရားသူကြီးက အမှုကိုလက်ခံစစ်ဆေးပြီး ပုဒ်မ ၅၊ အပိုဒ်ခွဲ (၁)အရမည်သူမဆို အခြားသူတဦးတယောက် ပြည့်တန်ဆာအဖြစ်ဖြင့် စီးပွါးရှာဖွေရရှိသည်ကို သိလျက်နှင့် ထိုသူရှာဖွေရရှိသောစီးပွါးကို လုံးဝဖြစ်စေ၊ တစိတ်တဒေသဖြစ်စေ၊ မှီ၍အသက်မွေးမြူလျှင်၊ ထိုသူကို အလုပ်ကြမ်းနှင့် တစ်နှစ် ထက်မနည်း ငါးနှစ်ထက်မပိုသည့် ထောင်ဒဏ်ချမှတ်ရမည့် အပြင် ငွေဒဏ်လည်းချမှတ်နိုင်သည်ဟု သိရပြီး၊ အမှုကို ဆက်လက်ဆောင်ရွက်ဆဲဖြစ်သည်။
*****@@@****
အတိတ်ဆိုတာ အတိတ်မှာထားလို့ရခဲ့ရင် သိပ်ကောင်းသွားမယ်။ မာမာ ရဲ့ဘဝက ခါးသည်းခဲ့တယ် ဆိုပေမယ့် ကိုယ်ရွေးချယ်ခဲ့တဲ့ လမ်းမို့ ကျေနပ်စွာနဲ့ ခံယူနေဆဲပါပဲ။
********@@@********
#ဝင်းကျော်ခိုင်